ՀՀ արտակարգ և լիազոր դեսպան Արմեն Եդիգարյանը Եվրոպական խորհրդարանի պատգամավոր Անդրեյ Կովատչևին է փոխանցել երախտագիտության մեդալը

12 փետրվարի, 2022

2022թ. փետրվարի 12-ին Բուլղարիայում ՀՀ արտակարգ և լիազոր դեսպան Արմեն Եդիգարյանը Եվրոպական խորհրդարանի պատգամավոր Անդրեյ Կովատչևին է փոխանցել Հայաստանի անկախության 30-րդ տարեդարձի կապակցությամբ Հայաստանի Հանրապետության հետ բարեկամական հարաբերությունների հաստատման, ամրապնդման և զարգացման, համամարդկային արժեքների պաշտպանության գործում նշանակալի ավանդի համար ՀՀ նախագահի հրամանագրով շնորհված երախտագիտության մեդալը:

Դեսպան Եդիգարյանը, շնորհավորելով Ա.Կովատչևին, նշել է, որ շատ բարձր է գնահատում վերջինիս ներդրումը, առաջին հերթին մարդասիրական խնդիրների լուծման ուղղությամբ և հաջողություններ մաղթել գործունեությունում՝ ի շահ Հայաստանի և Բուլղարիայի միջև բարեկամական հարաբերությունների առավել ամրապնդման:

Շնորհակալություն հայտնելով բարձր գնահատանքի համար, Ա.Կովատչևը նշել է, որ Հայաստանը և Բուլղարիան ամուր կապերով կապված են և պետք է շարունակել այդ հարաբերությունների ամրապնդումը:

Հանդիսավոր արարողությանը ներկա են եղել բուլղար և հայ հյուրեր, ինչպես նաև հայ համայնքի ներկայացուցիչներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր